ସାଧୁ ସାବଧାନ – ଡଃ ପଦ୍ମଲୋଚନ ରାଉତ

Views: 12
0 0
Read Time:3 Minute, 57 Second

ଗୁଣୀ କରିଥାଏ ଗୁଣର ଆଦର
ମୂର୍ଖ କରେ ହତାଦର
ଭ୍ରମେ ଭ୍ରମି ଭ୍ରମି ଭ୍ରମର ଆସଇ
ଫୁଲ ଥିଲେ ଯେତେ ଦୂର l 1

ମୂର୍ଖ କରେ ନିନ୍ଦା ଦିଏ ଅପବାଦ
ଇର୍ଷାରେ ଯାଏ ସେ ଜଳି
ସହି ପାରେ ନାହିଁ ଗୁଣୀର ସମ୍ମାନ
ଭାବେ ସ୍ୱୟଂ ମହାବଳୀ l 2

ମହା ଜ୍ଞାନୀ ବୋଲି ନିଜେ ଭାବେ ମୂର୍ଖ
କରେ ଯୁକ୍ତି ଅବାନ୍ତର
ଆତ୍ମ ଗର୍ବୀ ସିଏ ବଡ଼ ଅହଙ୍କାରୀ
ସର୍ପ ସମ ଭୟଙ୍କର l 3

ନିଜର ଗାରିମା ବଖାଣି ମୁହଁରେ
ଦେଖାଏ ସେ ବଡ ପଣ
ଫର ଫର ହୁଏ ପୋଖରୀ ତୁଠରେ
ଦଣ୍ଡକିରି ମାଛ ସମ , l 4

ସଦା ପିଟୁ ଥାଏ ନିଜ ଢୋଲ ନିଜେ
ଆନକୁ ମଣେ ସେ ହେୟ
ସତେ ଅବା ସିଏ ଭାଷା ସରସ୍ବତୀ
ଲଭେ ନାହିଁ ପରା ଜୟ ? 5

ଲାଜ ସରମ ମୁଖେ ନାହିଁ ତାର
ସରଗକୁ ବାନ୍ଧେ ସିଡ଼ି
ଜ୍ଞାନବନ୍ତ ଜନ ଅରଜଇ ପୁଣ୍ୟ
ଜ୍ଞାନ ପଥେ ସଦା ଚଢି l 6

‘ଅଳ୍ପ ଜ୍ଞାନୀ’ ଜନ ବଣ ବିଛୁଆତି
ସର୍ବଦା କରେ ସେ କଳି
ସୂର୍ଯ୍ୟ ପାଶେ ଯେହ୍ନେ ଜଳୁଥାଏ ଡିବି
ପଛରେ ମାରେ ସେ ତାଳି l 7

ଇର୍ଷାତୁର ଜନ ସମାଜ ବଇରୀ
ବିଶ୍ୱାସରେ ଦିଏ ବିଷ
ସାବଧାନ ସାଧୁ ! ଅହଙ୍କାରୀ ଜନ
ଧରା କରେ ସର୍ବନାଶ l 8

ଗୁଣବାନ ଜନ ଅଟେ ସୂର୍ଯ୍ୟ ସମ
ପ୍ରକଟେ ସର୍ବ ତା ଜ୍ୟୋତି
ଅଜ୍ଞାନ କି ବୁଝେ ଗୁଣର ମହିମା
ଇର୍ଷା କରି ମରେ ନିତି l 9

ଇର୍ଷାତୁର ଜନେ ଦୂରରୁ ଜୁହାର
ସାଧୁ ହୁଅ ସାବଧାନ
ମାନବ ଜାତିର ପ୍ରଧାନ ଶତ୍ରୁ ସେ
ଚି଼ହ୍ନେ ନାହିଁ କେବେ ଗୁଣ l 10

ଡଃ ପଦ୍ମଲୋଚନ ରାଉତ
ଗବେଷକ, ଇଂରାଜୀ ସାହିତ୍ୟ
କଳିଙ୍ଗ ବିଶ୍ୱବିଦ୍ୟାଳୟ, ରାଇପୁର
ଇଂରାଜୀ ଅଧ୍ୟାପକ,
ଗୋପବନ୍ଧୁ ଡିଗ୍ରୀ କଲେଜ, କାଲିମେଳା
ମାଲକାନଗିରି l

Share this :
Next Post

ରାତିଟା ନ ଯାଉ ପାହି - ବିମଲ ସାସ୍ମଲ

ରକ୍ତର ରଙ୍ଗରେ ରଞ୍ଜିତ ଏ ପତ୍ର ଲାଗୁଛି ସୁନ୍ଦର ଭାରି, ଆଖିରେ ଲଗାଇ ଲାଜର କଜଳ ହସୁଅଛି ମନ ମାରି | ମନ ମୋ କହୁଛି ଧରନ୍ତି କି ତାକୁ ଛାତିରେ ମୋହର ଭିଡ଼ି, ମନ ଭିତରେ ମୋ ଯେତେ ଦୁଃଖ ଥାଉ ଆକାଶେ ଯାଆନ୍ତି ଉଡି | ତାକୁ ଦେଖି ହସେ କେତେ ପ୍ରଜାପତି ମନେ ଧରି ନୂଆ ଆଶା, ତାହାରି କୋଳରେ କେତେ ଯେ ବିହଙ୍ଗ ବାନ୍ଧିଥାନ୍ତି […]

Subscribe US Now