ଗାଁ ବରଷା – ଡ. ପଦ୍ମଲୋଚନ ରାଉତ

Views: 35
0 0
Read Time:4 Minute, 18 Second

ଯେବେ ଆସେ ବର୍ଷା ଆମରି ଗାଁକୁ
ଦୂର ତାଳ ବଣ ଡେଇଁ
ଘୋଟେ କଳା ମେଘ ଅନନ୍ତ ଆକାଶେ
ସରେ ଫୁଟେ ନୀଳ କଇଁ
ଶଙ୍ଖଚିଲ ଯାଏ ଉଡି
ବାହୁଡନ୍ତି ଗୋଠ ହୋଇ ତର ତର
ମାରେ ଯେବେ ଘଡଘଡି l 1

ମୋ ଗାଁ ଦାଣ୍ଡରେ ରିମଝିମ ସ୍ଵରେ
ବର୍ଷା ଯେବେ ଯାଏ ନାଚି
ଗହୀର ପାଟରେ ବିଜୁଳି ଚମକେ
ନୂଆ ବୋହୁ ଦେଖେ ଲୁଚି
ମୁହଁରେ ଓଢଣା ଦେଇ
ଘର ପାଇଟି କରୁଥାଏ ସଦା
ତା’ ସମ କିଏ କାହିଁ ? 2

ଗିରିଷମ ଅନ୍ତେ ଆଷାଢ଼ ଆସନ୍ତେ
ମଉସୁମୀ ଆସେ ଧୀରେ
ଉତ୍ତରା ପବନ ଚୁମି ଦିଏ ଯେବେ
ଅମୃତ ବାରି ଝରେ
ଚଷା ପୁଅ ମନ ଖୁସି
ସବୁଜ ପଣତ ଉଡାଇ ତା କ୍ଷେତ
ଡାକୁଥାଏ ହସି ହସି l 3

ମୁଣ୍ଡରେ ପଖିଆ ହାତେ ଧରି ବାଡ଼ି
କ୍ଷେତେ ଚାଲେ ଚଷା ପୁଅ
ଟୁପୁରୁ ଟୁପୁରୁ ବରଷଇ ମେଘ
ଆଖିରେ କିମ୍ପା ତା ଲୁହ ?
ପୂରେ ନାହିଁ ତାର ପେଟ
ସଞ୍ଜବତୀ ଜାଳି ଘରଣୀ ତାହାର
ଚାହିଁ ବସିଥାଏ ବାଟ l 4

କଳା ମେଘେ ଉଡି ଧଳା ବଗ ପଲ
ଦୂର ଚକ୍ରବାଳେ ମିଶେ
କେତକୀ -ମାଳତୀ କେତେ ଫୁଲ ଫୁଟି
ମହ ମହ ହୋଇ ବାସେ
ଗାଁର ବରଷା ଧାରା
ମନେପଡେ ମୋର ପିଲାଦିନ ସ୍ମୃତି
କେଡେ ଆପଣାର ପରା ! 5

ଟପ ଟପ ହୋଇ ଝରି ପଡେ କେତେ
ଓଳିରୁ ବରଷା ବାରି
‘ଭାସି ଯାଆ ମୋର କାଗଜ ଡ଼ଙ୍ଗା ‘
ଜଣା ପଡେ କାଲି ପରି
ବାଡ଼ରେ ଅପରାଜିତା
ବରଷା ଆସିଲେ ଉତ୍ତର ଦିଗରୁ
ମନେପଡେ ଗାଁ କଥା l 6

ଗାଁ ଗୋହିରିରେ ଛୁଟେ ପାଣି ସୁଅ
ଦୂରେ ହସେ ଧାନ କ୍ଷେତ
କାଳିଆ -ବଳିଆ କ୍ଷେତରେ ବୁଲନ୍ତି
ଆସଇ ଗୁଣ୍ଡିଚା ଯାତ
ଝିପି ଝିପି ଝରେ ବାରି
ଘଡଘଡି ମାରେ ବିଜୁଳି ଚମକେ
ସ୍ମୃତି ଅଟେ ଅସୁମାରୀ l 7

ଡ. ପଦ୍ମଲୋଚନ ରାଉତ
ଇଂରାଜୀ ଅଧ୍ୟାପକ,
ଗୋପବନ୍ଧୁ ଡିଗ୍ରୀ କଲେଜ, କାଲିମେଳା,
ମାଲକାନଗିରି l
( ଗବେଷକ, ଇଂରାଜୀ ସାହିତ୍ୟ,
କଳିଙ୍ଗ ବିଶ୍ୱବିଦ୍ୟାଳୟ, ରାଇପୁର )

Share this :
Next Post

ଭାରତ ମହାନ - ଧରିତ୍ରୀ ଦାସ

ବେଳ ଥାଉଁ ସଚେତନ ହୁଅରେ ଭାରତ ବାସୀ କର୍ମ କର ଵୋକଚା ବୋହିବାରେ ନହୋଇ ଖୁସି। ନେତାଙ୍କ ପଛରେ ଗୋଡ଼ାଇ ମାରନାହିଁ ପୋଷ୍ଟର ଚାମଚାଗିରି କରିବାରେ ହୁଅନାହିଁ ମାଷ୍ଟର। ନିଜ ଗୋଡ଼ରେ ଛିଡା ହେବାକୁ ଚେଷ୍ଟା ତୁମେ କର ପିତା ମାତାଙ୍କ ପାଶେ କେବେବି ପତାଅନି କର। କଳି କତରାଳ ନ କରି ମିଳିମିଶି ଚଳିବ ନିତ୍ୟ ବ୍ୟବହାର୍ଯ୍ୟ ଜିନିଷ ନିଜେ ପ୍ରସ୍ତୁତ କରିବ। ପ୍ରତି କଥାରେ ବିଦେଶ ଉପରେ […]

Subscribe US Now