କେମିତି କହିବି କହ – ଶାନ୍ତି ଲତା ରଥ

Views: 28
0 0
Read Time:2 Minute, 50 Second

 

ସରଗରୁ ହାତ ବଢ଼ାଇ ମରତେ
ଭକତକୁ ଯିଏ ଦିଏ
ହାତ ନାହିଁ ବୋଲି କାଳିଆ ଧନର
କେମିତି କହିବ କିଏ? ।
ଲକ୍ଷେ ଯୋଜନରେ ଗଜ ଡାକିଥିଲା
ରଖ ପ୍ରଭୁ ନାରାୟଣ
ହସ୍ତେ ଚକ୍ର ଧରି ନକ୍ରକୁ ନାଶିଲେ
ସେ ଦୟାଳୁ ଭଗବାନ ।
ମହାବାହୁ ସିଏ ହାତକୁ ଅଦୃଶ୍ୟ
କରି ଲୀଳା କରୁଅଛି
ବିପଦରେ ପଡ଼ି ଭକତ ଡାକିଲେ
ତା ପାଖକୁ ଧାଉଁ ଅଛି ।
ସରଗରୁ ଗୋଡ ବଢେଇଲେ ଯିଏ
ମରତକୁ ଲମ୍ବିଯାଏ
ଗୋଡ ନାହିଁ ବୋଲି କାଳିଆକୁ ମୋର
କେମିତି କହିବ କିଏ।
ଯେତେ ଦୂରେ ଥାଉ ଅନ୍ତର ଖୋଲିଣ
ଡାକିଲେ ଭକତ ତାକୁ
ଭକତର ଦୁଃଖ ସହି ପାରେ ନାହିଁ
ଧାଇଁ ଆସେ ତା ପାଖକୁ ।
ଅନ୍ତର୍ଯ୍ୟାମୀ ସିଏ ଅନ୍ତରର ବ୍ଯଥା
ସଭିଙ୍କର ଜାଣି ପାରେ
ଦୁଃଖ ହାରୀ ସିଏ ପତିତ ତାରଣ
ନିମିଷକେ ଦୁଃଖ ହରେ ।
ହାତ ଗୋଡ଼ ସବୁ ଅଦୃଶ୍ୟ କରିବା
ଅଟ ଇ ଲୀଳା ତାହାର
ଲୀଳାମୟ ସିଏ ଲୀଳାକୁ ତାହାର
ନ ବୁଝନ୍ତି ବ୍ରହ୍ମାହର ।
ବଡ ଦେଉଳରେ ବସି ସିଏ ପରା
ଏ ବ୍ରହ୍ମାଣ୍ଡ ଦେଖୁଅଛି
ଜଗତ ପାଳକ ମ ଉନରେ ବସି
ଏ ଜଗତ ପାଳୁଅଛି ।
ଆହେ ଦୟାମୟ କାଳିଆ ସାଆନ୍ତ
ମୋ ପରେ ଦୟା ରଖିବ
ଧନ ସମ୍ପଦ ମୋ ଲୋଡା ନାହିଁ ପ୍ରଭୁ
ଦୟା କଣିକାଏ ଦେବ ।

ଶାନ୍ତି ଲତା ରଥ
ଅନୁଗୋଳ

Share this :
Next Post

ଶ୍ରୀକ୍ଷେତ୍ରେ ଯିବୁ କି ବୁଲି - ପ୍ରିୟମ୍ବଦା ରାଉତ

ରଥ ଚାଲେ ହଲି ଝୁଲି ଲୋ ବଉଳ ରଥ ଚାଲେ ହଲିଝୁଲି, ରଥରେ ଦେଖିବୁ କଳା ସାଆନ୍ତକୁ ଶ୍ରୀକ୍ଷେତ୍ରେ ଯିବୁକି ବୁଲି l (ଘୋଷା ) ପୋଡ଼ପିଠାରେ ତା ଅଧିକ ଶରଧା ଯାଏ ସେ ମାଉସୀ ଘର, ଖଣ୍ଡେ ପୋଡପିଠା ଧରିଥା ସଜନୀ ଜଗାକୁ ଦେବା ଆମର l ନାଲି ଓଠ ତାର ଆହା କି ସୁନ୍ଦର ହସିବ ସେ ଖିଲି ଖିଲି l ବଡଦାଣ୍ଡେ ତାର ଶରଧା ବାଲିକୁ […]

Subscribe US Now