ସ୍ମୃତି ସେତ ଅଭୁଲା ଅତୀତ – ଶ୍ରୀମତୀ ଛବିରାଣୀ ପତି

Views: 21
0 0
Read Time:3 Minute, 2 Second

 

ବିପର୍ଯ୍ୟୟ ଗ୍ରସ୍ଥ ସ୍ଥିତି ଅବସ୍ଥିତି
ମଣିଷର ପରିସ୍ଥିତି
କହିଲେ ନ’ସରେ ଦୁଃଖଦ ଯନ୍ତ୍ରଣା
ବିଗତ ଦିନର ସ୍ମୃତି ।

ମୃତ୍ୟୁ ଖେଳୁଥିଲା ବରି ଅମରତ୍ତ୍ଵ
ସଂଗ୍ରାମୀ ମାନବ ସାଥେ
ଜିତାପଟ ହୋଇ ବାଜି ମାରୁଥିଲା
କାଳର କରାଳ ହାତେ ।

କୋକୁଆ ଭୟରେ ବରଷ ତମାମ
ମହାମାରୀ ଦେଲା ବୋଲି
ବିସ୍ମୟ ପ୍ରକାରେ ନାଚାର ପଣରେ
ମୃତ୍ୟୁ ରଚିଗଲା ହୋଲି ।

କାଳିମାର ଫର୍ଦ୍ଦ ଜନ ଇତିହାସେ
ଏପରି ହୋଇଲା ଯୋଡା
ତା’ ଚିତ୍ର ଚରିତ୍ର ସମୀକ୍ଷାର ଯୁ ‘
କାହିଁ ପଡ଼ିବନି ଲୋଡା ।

ସେ ପୃଷ୍ଠା ସ୍ୱାକ୍ଷରେ ଲିପିବଦ୍ଧ ଖାଲି
କୁଢ଼ କୁଢ଼ ଅବସୋସ
ଏ’ ଜୀବନେ କେହି କିଛି ମୋର ନୁହେଁ
ଦେଇଗଲା ଯା’ ସନ୍ଦେଶ ।

ଗୃହବନ୍ଦୀ ହୋଇ ମୁହେଁ ତୁଣ୍ଡି ଦେଇ
ଲୁଚିଲା ମଣିଷ ଯହିଁ
ଶୁଦ୍ଧି ହେବା ଦୂର କାନ୍ଦିବାକୁ ତର
ନ’ଥିଲା କାହାଠିଁ କାହିଁ ।

ଭାରି ବଳବାନ ଏ’ ସମୟର ଚକ୍ର
ଦେଖାଏ ତାଣ୍ଡବ କେତେ
ଊଜାଣି ବୋହିଲେ ବିଭୀଷିକାମୟେ
ବୁଡେ ଭିତ୍ତିଭୂମି ଯେତେ ।

ଆଗନ୍ତୁକ ଏହି ନୂଆ ସୂର୍ଯ୍ୟୋଦୟେ
ଆଶାରେ ପଖାଳି ନେତ୍ର
ସୁଖ ସମ୍ଭାବନା ବୀଜ ବିପ୍ପଣୀରେ
ସ୍ମରିବା ଶ୍ରୀଜଗନ୍ନାଥ ।

ଶ୍ରୀମତୀ ଛବିରାଣୀ ପତି
ମଧ୍ୟଶାସନ, ବିରିଡ଼ି,
ଜଗତସିଂହପୁର । ।

Share this :
Next Post

ଆସିବରେ ନୂଆ ବରଷ - ସୁସ୍ମିତା ଶତପଥି

  ଜାନୁଆରୀ ପହିଲା ଆସୁଛି ଆସିବ ସମୟର ଚକ ଗଡେ ଇଂରେଜମାନଙ୍କ ନୂଆ ବର୍ଷ ପାଳନେ ତୁମ ମନ କିମ୍ପା ଉଡେ। ପଉଷ ମାସର ଏହି ଶୀତୁଆ ସଞ୍ଜରେ କିବା ହୋଇଥାଏ ନୂଆ ବଦଳେନି ପାଗ ବଦଳେନି ଋତୁ ଚାଷ ବାସ ପୋତା ରୁଆ। ହିନ୍ଦୁ ନୂଆବର୍ଷ ଆସଇ ସଧିରେ ଉପଯୁକ୍ତ ତିଥି ବାରେ ଚୈତ୍ର ଶୁକ୍ଳର ପ୍ରତିପଦା ତିଥି ନୂଆ ରଙ୍ଗ ସତେ ଭରେ। ନଵ ପଲ୍ଲବରେ ନବ […]

Subscribe US Now