ଭୋକ – ଫ୍ରାନସିସ୍ ଶତପଥୀ

Views: 29
0 0
Read Time:4 Minute, 46 Second

ଫୁଟପାଥରେ ଦେହଟେ ;

ଦେହ ବୋଲି ହାଡ଼ ଉପରେ

କେଇ ପରସ୍ତ ଚମ–

ଅଙ୍ଗପ୍ରତ୍ୟଙ୍ଗ ଯେଝା ଜାଗାରେ ଥୁଆ ;

ଲୁଗାଟେ ପଡ଼ିଛି ନାଁକୁ ମାତ୍ର—-

ବସ୍ତ୍ର ବିନା ସୂତା ନ୍ୟାୟରେ ;

ଲାଜ ଲୁଚିବା ପାଇଁ —- 

ଲୁଚୁଛି କେଉଁଠୁ ??

ପାଖରେ ସେମିତିଆ ଆଉ ଗୋଟେ ଦେହ

ବେସ୍ ଛୋଟ, ତା ଠୁ ଜନମ ;

ଭିକାରୀ ପିଲା, ପରିଚୟ ନାହିଁ ,

ପାପଟିଏ, ନ ଚାହିଁ ବି ଫୁଟି ଯାଇଛି —

କେଉଁ ଅପରିଚିତର ଦୁର୍ବଳ ବେଳାର

କାମନାର ଫଳ ହୋଇ ;

କାନ୍ଦୁଛି ଚିହିରି ଛାଡ଼ି ।

ଖୋଜୁଛି ସେ ଖାଦ୍ୟ

ମା’ର କଙ୍କାଳ ଉପରେ ଝୁଲି ପଡ଼ିଥିବା

ହଳେ ମାଂସ ପିଣ୍ଡୁଳାରୁ —-

ପ୍ରୟାସ ଜାରି..  ଫଳ ଶୂନ୍ୟ —

ଆସିବ ବା କେମିତି ??

ଦୁଇ ଦିନ ହେଲା ଖାଦ୍ୟ ପଡ଼ିନି–

ପେଟ ଖାଲି, ଦେହ ଜରେଇଛି ।

ଏବେ ମୁହଁ ସଞ୍ଜ ;

ଆଗରେ ଦୁଇଟି ପୁଡ଼ିଆ —

ଭୋକିଲାର ଦାନା, କେତେ କଣ ଅଛି–

ମା ଖାଇଲା– କିଏ ଦେଲା, କାହିଁକି ଦେଲା

ନିଘା ନାହିଁ.. ଇଛା ବି ନାହିଁ–

ଭୋକ ଜାଣେନା ପାପ ପୁଣ୍ୟ,

ଦାତା କିଏ….ଦଇବ କିଏ;

ଦାନବ କିଏ …. ମାନବ କିଏ ।

ଏଣେ ଦାତାଙ୍କର ନୂଆ ଅବତାର

ଭିତର ଜନ୍ତୁର ଆବିର୍ଭାବ,

ସେଇ ଫୁଙ୍ଗୁଳା ଦେହରେ ହାତ ବୁଲିଲା

ସାରା ଶରୀରକୁ ଛୁଇଁଲା ସେ–

ଆପାଦମସ୍ତକ….ଧୀରେ ଧୀରେ–

ଅନୁଭବ କରୁଥିଲା ଗୋଟେ ମଜବୁର

ଲଙ୍ଗଳା ଦେହକୁ ।

ନିଃଶ୍ବାସ ତୀବ୍ର ହେଲା ଧୀରେ ଧୀରେ–

ଦୁଇ ଦେହ ଘର୍ମାକ୍ତ —

ବାହାର ଦେହଟା ବଞ୍ଚିବା ପାଇଁ

ଭିତରଟାକୁ ମରିବାକୁ ହେଲା– ପୁଣି ଥରେ–

ଗୋଟିଏ ଭୋକିଲା

ଆଉ ଗୋଟେ ଭୋକିଲାର

କାମରେ ଆସିଲା–

ଦୁଇ ଅଚିହ୍ନା ଦେହ ଏକ ହୋଇ ଗଲେ,

ରତିକ୍ଳାନ୍ତା ସଞ୍ଜ ଏବେ ରାତି ହେଉଥିଲା ।

ଏଥର ସେ ଶୁଷ୍କ ମାଂସ ପିଣ୍ଡୁଳାମାନ

ଜୀବନ୍ତ ହୋଇଗଲେ–

ନିର୍ଝରିଲେ ଆଉ ଥରେ,

ଚର୍ମରନ୍ଧ୍ର ଭେଦି — ମାତୃତ୍ୱର ମହକ ନେଇ

ଛୁଆଟି କିଛି ନବୁଝି ମୁହଁ ଲଗାଇଲା–ସବୁଥର ଭଳି

ଏକା ଥରକେ ଗୁଡ଼ିଏ ଭୋକ—-

ମେଣ୍ଟିଗଲେ କିଛି ପାପ ସହ—-

ଆଉ ଗୋଟେ କ୍ଷୁଧାଜ ପାପର 

ଆସିବା ଅପେକ୍ଷାରେ ।।

ଫ୍ରାନସିସ୍ ଶତପଥୀ

ବଡମ୍ବା

କଟକ

Share this :
Next Post

କ୍ଲାନ୍ତି - ପ୍ରଶାନ୍ତ କୁମାର ବିଶ୍ବାଳ

  କ୍ଲାନ୍ତି  ନିଦ୍ରା ର ଏକ ପୁର୍ବ ସ୍ଥିତି ମୁକ୍ତି ପଥ ର ବତୀ ଶକ୍ତିହୀନ ଶରୀର ଭାବଶୁନ୍ୟ ମନ ଚତୁଃପାର୍ଶ୍ଵରୁ ବିକର୍ଷିତ ଜୀବନ ଖୋଜୁଥାଏ ଢାଳିଦେବ ଶରୀର         ବାସ୍ ଆବଶ୍ୟକ ଏକ ସ୍ଥାନ ଅନୁଭବ ହେବ ଜୀବିତ ଅବସ୍ଥାରେ ମୃତଅବସ୍ଥା ଚେତନାରୁ ଅବଚେତନାକୁ ଏଠି ସବୁ ତପ ଜପ ସାଧନା ବିଫଳ କେବଳ ଗମନ ଚେତନା ରୁ ଅବଚେତନା ପ୍ରଶାନ୍ତ କୁମାର ବିଶ୍ବାଳ ବଡମ୍ବା […]

Subscribe US Now